自從柴灣開咗UnderCover後，唔少排隊黨經常在此搵食，其實𠵱家嗰頭多咗好多明星名人出沒，早排我個排隊黨老友就喺嗰度撞到好耐冇出現嘅「猿靚靚」同佢男友，估唔到佢哋既愛猿人又愛UC，靚靚亦甚有女強人本色，於店內大聲指揮男友，男友絕不敢反抗。其實UC𠵱家已變成了一個景點，值得入去走一趟，參觀一下！另一熱辣辣話題仍然係4月1日中環開APE，好多人都擔心水貨舖捱唔捱到？不過銅鑼灣總統「日指」老闆就有另一睇法：「其實唔使咁擔心，香港開APE，反而可能令香港APE二手巿場更熾熱，因為香港班排隊黨多咗個地方搵食，到時可能落中環掃斷某部份款，扔落嚟俾我哋或上Yahoo拍賣場賣畀香港人，隨時APE聲勢可能仲勁過以前！不過亦有隱憂喎，如果到時香港APE太多貨賣的話，啲𡃁仔覺得唔夠馨香，加上多咗中環班OL落去幫襯，如果由佢哋嚟着APE，好容易將APE變成Y3，咁就係咁先囉！講到底，APE日本話事人其實好明白牌子成功背後嘅原因，希望佢哋keep好來貨量，唔好俾香港人玩殘！」
大食Jack（[email protected]）