數碼影音：3吋巨芒逼爆機富士V10賣靚背

數碼相機個芒愈來愈大已經係個大趨勢，富士就玩大啲，將一部超細機身嘅V10加入3"大芒，單睇機背得番啲啲位擺幾粒掣，就知細機配大芒有幾震撼！最搞鬼就係加埋打機功能，射擊、Puzzle樣樣有，咁大個芒玩起上嚟舒服得多啦！
記者：許福合
攝影：黃子偉
ImageGirl：Cat

V10係富士首部3吋芒數碼相機，暫時嚟講3吋芒機種選擇唔多，加上V10使用第5代SuperCCDHR，ISO感光度高達1600，影夜景真係一流！值得一提係今次行貨幾威，部V10連日本總部都未有，香港率先推出市場，相信今次冇人會返水貨喇。

■快過日本推出

3吋芒佔滿機背

V10所內置嘅3吋芒，喺使用時感覺特別大同誇張，事關V10機背大小只有83×64mm，放上個3吋大芒之後，除咗四邊只有幾mm嘅邊框，機背就只有底部放得落幾粒掣，幾乎整個背面都被3吋芒佔據，視覺效果特別強烈。以顯示質素來講，V10個芒大得來其實都算唔錯，反應又夠快，只係當用家身處較暗位置時，畫面明顯「粒粒」比較多，一般使用就問題不大。由於機背已經被屏幕佔據，所以操作上亦都同一般DC唔同，常見嘅十字掣「上」、「下」會改用推桿代替，而操作時方向鍵配合快速掣，可快速轉換各種拍攝模式，呢種操作常見於高檔DC，不過以V10定位來講，似乎就唔係咁UserFriendly喇。

■3吋芒機身尚算小巧，比八達通還要小。

■機仔細細，厚度約如一個5蚊銀。

■鏡頭提供3.4倍光學變焦。

■芒大嘅好處，係睇4張Prview都清楚。

昏暗環境冇甩拖

V10有效像素為510萬，相片最大輸出為2,592×1,944，加上富士DC高感光度設計，用家可選用ISO1600拍攝，同時又保持低雜訊效果，遇着昏暗環境都影到滿意靚相。
鏡頭具3.4倍光學變焦，另加5.7倍數碼變焦，雖然拍攝闊景未夠班，不過最大光圈就提供F2.8，亦算好用。當搭車等人時，拎出嚟打機又係V10賣點之一，利用3吋芒優點，玩起上嚟舒服過手機JavaGames好多。