「你哋都休養生息夠喇，重唔出嚟曬太陽？」古歐洲貴族們春天愛策騎狩獵，皆因野生動物一到春天回復跳跳扎，有十足運動量血液循環特別好，隻隻都肥肥白白，所以我一聽到法國野味即時食指大動，唔係Blueblood唔使動刀弄槍就有得歎，仲要係最嫩口嘅兔仔腿肉㖭，正到痹呀！殘忍？咁你食齋喇。
記者：盧家蕙
攝影：黃子偉
模特兒：Carrie、Bianca（Salvador）
「LaFleur」邊師傅曾在法國餐廳「LeFauchon」、「LaBistro」當廚，他好慨歎話：「幫人打工，留住嘅客人都唔屬於自己嘅。」所以他放棄高薪厚職，與Johnny合力打造了這家格調沉實的法國小店，完成開餐廳的夢想。看裝修，一室米白色內牆與Openkitchen設計，店子擺設不多，除收藏的佳釀酒瓶外，就只有牆上的多幅油畫，圖案也不離太陽花、出海揚帆，刻意營造一貫歐陸小店的和諧感覺。店子的食物每星期由法國空運到港，師傅對食物的執着，可透過配菜略知一二，為做出滑溜口感，他堅持用人手把薯仔磨成茸：「真心㗎，我淨係想啲客食得開開心心，坐得舒舒服服。」要表揚他的一絲不苟，把整道菜幹掉，便是最佳方法。
法式鴨腿$145（a）
製作步驟蠻複雜，先煙熏，後油浸，再焗香，油浸有助把肉汁精華鎖緊，入口皮脆肉嫩，香口不已。
燒法國鵪鶉配香煎鵝肝$220（b）
邊師傅：「鵪鶉仔肉好嫩滑，配法國名牌Rougie鵝肝最夾。」鵪鶉肉肉厚骨幼，鵝肝外層香脆內層豐腴甘香，跟鮮嫩Juicy的鵪鶉肉頓成絕配。
紅酒燴野兔腿$150（c）
煙肉包裹整條兔腿，燒香後再用紅酒燴熟，鹹脆的煙肉味逼入兔肉，嫩滑口感有點像雞肉，咀嚼時紅酒甜味漸次散開，好正。
燒法國小公雞配紅酒芥末籽汁$145（d）
師傅話：「小公雞即雄性春雞，用菜養到手掌咁大，每隻350克左右肉質就最柔嫩。」嫩滑雞肉澆上紅酒芥末汁後，酸酸甜甜好醒胃。
厚切鹿扒配野菌汁$180（e）
師傅說：「厚切比薄切好，因為厚肉燒起嚟更香口好味。」鹿肉水份充足，煮熟後肉汁仍然豐富，加野菌汁能減少羶味之餘，更能突出鹿肉的醇香。
煙野生鰻魚仔$135
驟眼看以為係蛇肉，甩皮去骨的歐洲野生鰻魚仔入口鮮美，肉質綿軟帶點煙韌。邊師傅說：「野生鰻魚好難養大，所以比較少有，物以罕為貴呀。」
食客有Say
Biacna：「一餐法國餐都不過幾百蚊，兩個人撐抬腳都唔會肉赤。」
Carrie：「我覺得兔仔肉最香最好味，初頭仲估兔仔肉好嚡口㖭。」
LaFleur（28667337）
地址：灣仔進教圍16號地下
營業時間：星期一至六12:00nn-2:30pm，6:00pm-11:00pm，星期日6:00pm-11:00pm
座位：35個