玖龍紙業上市，認購情況熾熱，經紀Ｒ叫左丁山入飛，但唔借孖展，只用實錢。經紀Ｒ話：「超額起碼一兩百倍，都唔知會抽到幾多，恐怕會蝕晒啲利息，求其入飛博好彩便是，抽中嘅話，當賺到一餐海都晚飯。照我睇就賺梗嘅，食得唔好嘥。」經紀Ｒ講到實牙實齒，惟有係咁意捧場。
後來睇番啲資料，咦，乜個董事會咁騎呢，創辦人及佢嘅老公、細佬、乖仔，全部坐晒響度，家族色彩濃厚到極，唔啱香港董事學會年年倡議嘅最佳公司管治準則噃。而且嗰位公子只得二十四歲，大學未畢業，點解咁快就做董事呀？好公司怕搵唔到人咩！
問番經紀Ｒ，佢無言以對，只能講：「係騎呢啲，我好似未見過以前曾有同類情況。不過算啦，風乘火勢，搭一轉順風車，贏番餐飯都唔錯吖，咁多國際基金都入飛，你唔使驚喎！」
驚就唔會，但覺得於理不合，保薦人理應早向「玖龍」提意見，指出不妥之處，港交所上市委員會亦唔應該批准咁嘅董事會組合。固然有好多上市公司富有家族色彩，但擒擒青搵位未讀完書嘅仔做董事，好難服眾啫，如果佢係甚麼造紙學博士或名校MBA，已有工作經驗，又當別論吖！
經紀Ｒ話選擇內地企業股，雖話管理階層十分重要，但亦睇無可睇，話識睇嗰個，都係呃自己。譬如劉金寶咁出名，對中銀香港上市功勞咁大，事前你點會預測到劉金寶會被送上法庭，罪名嚴重？其他國企民企嘅管理層，不時出現「雙規」情況，啲分析師又可以一早睇到咩？左丁山冇法子反駁經紀Ｒ，又因為已經入咗飛，都冇謂拗咯。投資內地民企股，做盲俠，用聽聲劍，一樣有斬獲。不可不知嘅就係，盲俠雖盲，睇唔到嘢，但耳仔極度靈敏，買民企股，要用耳仔多過用眼。