新股繼續狂熱，昨日首日掛牌的長安民生物流（8217）表現超班，最高見5.10元，收4.95元，較招股價2.7元高出83％，雖然隻股係創業板股，並無進行公開招股，貨源歸邊炒上唔難，但以昨日成交股金額有5562萬元計，似乎有唔少炒家落場炒賣。
至於熱爆的玖龍造紙（2689），掛牌之日肯定成為全場焦點。
股價重新浮水
另外，上市之時甚多不利傳聞的現代美容（919），昨日約同證券界人士及傳媒傾偈，大搞投資者關係，股價表現亦不負所望，升5.05％，收1.04元，終於重返1元招股價之上收市。
經紀陳話，隻股上市之初，最低被質落至0.78元，不過保母密密掛買盤力接，股價彈番上0.90元水平。幕後人收咗咁多日貨，睇嚟要沽嘅已差唔多沽清。昨日配合公司活動，股價重新浮水其實係意料中事。至於隻股日後能否修成正果，重獲芬佬歡心，就要睇佢張成績表靚唔靚咯。
慕容小初