好多人話香港年輕一輩政治冷感，但睇每年7．1同要求普選大遊行有幾多有心人上街，就知此說非真。而一班青年專業人士，更組成一個叫做「三十會」嘅論壇組織，一班核心成員輪流發表文章，展現年輕一代對社會時事的看法。最近佢哋將04、05年嘅文稿重新整理成書，叫《30而立》，噚日搞咗個新書發布酒會，陳智思、李永達、張炳良都有去捧場（圖），田北俊、曾鈺成、林在山、謝凌潔貞、余若薇就幫手寫序。華華同佢哋係鄰居，當然要捧吓場，呼籲大家買多幾本書。
呢個會係喺03年沙士及7．1後，三個啱啱30出頭嘅專業人士發起成立，家吓已有四百幾個會員，可算是代表香港有知識的中產階層。佢哋冇既定政治立場，冇與任何團體聯繫，亦冇接受其他人財政支持，透過獨立思考的言論，希望能就重要的議題，提出一些有根據的意見，亦不時落區親身做義工，係有心人。