葉璇、呂晶晶、張嘉倫同劉錫賢噚日喺尖沙嘴，出席亞視舉行的《第十二屆十大電視廣告頒獎典禮》記者會，亞視方面可能有見之前播出嘅劇集《情陷夜中環》口碑唔錯，加上葉璇近排又人氣急升，所以今年專登搵佢做頒獎典禮主持人。
顯示才藝
而葉璇噚日都好畀面亞視，一身打扮露晒bra帶咁，都算性感，佢重配埋一套米奇老鼠水晶飾物出場，問到佢今次酬勞係咪好吸引，佢話：「真係好滿意，都有成六位數字，而且啲衫都係由大會負責。」
原來今次葉璇除咗做主持之外，重會同陳啟泰表演一場歌舞劇，佢話好多謝亞視，因為可以俾觀眾睇到佢多才多藝嘅一面。本身都有拍過廣告嘅葉璇重話想拍沐浴露廣告，問到佢會唔會考慮拍性感內衣廣告，佢話：「街上嘅硬照就唔好喇，如果喺電視播都可以考慮，始終都有電視嘅尺度去限制。」
