著名演員兼評馬人董驃（驃叔）前晚在銅鑼灣聖保祿醫院病逝，享年七十二歲。驃叔去年九月因心臟病入院動手術，其後出現心肺功能衰退，上周四再度入院。驃叔在娛樂圈中人緣頗佳，前晚其死訊傳出，一眾生前好友如黎小田、李香琴、謝賢和薛家燕均深表悲痛。
身為著名評馬人的驃叔，生前經常誇口：「我係董驃你唔係，我講馬你要聽。」但他私下卻從不鼓勵賭博，鄭裕玲表示驃叔從不會在片場派貼士，而吳國敬則說：「驃叔話最好嘅貼士就係唔好賭。」
鄭裕玲：豪爽萬歲得人心
八十年代電影最蓬勃嘅時候，我都同驃叔拍過戲，佢係一位善良長者，記得喺片場裏邊，佢成日萬歲請食嘢，為人豪爽。佢身為評馬人，但就好少畀貼士大家，因為佢成日話唔鼓勵人賭馬喎！
謝賢：永懷真摯老朋友
我同驃叔當年拍戲相識，大家又喺加拿大住，所以好多共同話題，我哋大大話話都識咗幾十年，突然話佢病逝，我聽到呢個消息，個心好唔舒服。驃叔待人好真摯，好關心朋友，我諗係佢嘅朋友必定好懷念佢。
汪明荃：為人親切重義氣
我同驃叔一齊合作過粵曲演出，聽到佢死訊好意外，佢雖然七十二歲，但以𠵱家嚟講呢個年紀都好年輕，咁快就走咗，真係好可惜。我印象中嘅驃叔為人友善親切，仲好有義氣。
任達華：對電影圈貢獻大
我有時都會同驃叔約埋食吓飯，傾吓自己嘅近況，佢份人好好，對馬圈同電影圈都有好大貢獻。雖然死亡係人生必經之路，但佢先七十二歲，真係走快咗幾年，最遺憾係好多後輩冇機會同佢合作。
吳國敬：活潑老人家夠勁
我一向好鍾意睇驃叔主持嘅賽馬節目，佢嘅評述手法好活潑有趣，驃叔講嘢又有說服力，一啲都唔悶，好勁。試過有一次我同張衞健同安仔（許志安）飲嘢撞到驃叔，佢話最好嘅貼士就係唔好賭。
李香琴：逝前通電中氣足
我曾經同驃叔去林太（林百欣太太）屋企一齊操曲，佢嘅歌聲唔錯，份人又熱心，驃叔唱好多首歌都好聽，尤其係《醉打金枝》。我一直都聽聞佢有病，十幾日前我打過電話問候佢，驃叔重自己聽電話，佢當時中氣十足咁答我佢冇嘢，多謝關心。
黎小田：球技出色喜認叻
我大約年多前食飯撞過驃叔一次，佢當時個樣都好憔悴，但我就冇問過佢嘅病情。驃叔除咗評馬，佢都好鍾意認叻，佢以前成日同新馬師曾一齊打枱波，論球技就梗係驃叔勝一籌。佢雖然評馬，但我就冇試過問佢攞貼士，佢反而有試過問番我㖭！
房祖名：香港失重要人物
我覺得佢好錫後輩，係一個好溫柔、好體貼嘅一個老人家，佢係其中一個不可缺少嘅長輩，而且係香港嘅幾重要嘅人物。我覺得我犯咗一個錯誤，我其實諗住探吓驃叔，因為呢排忙緊，又唔想太夜去，成日都畀個藉口自己，冇向驃叔打個招呼。
薛家燕：風趣幽默無冷場
我以前同黎小田合作《家燕與小田》時，驃叔都有嚟參加演出，佢份人講嘢風趣幽默，大家合作就絕冇冷場，我之前都聽過佢身體唔係幾舒服，不過就唔知咁嚴重，噚晚接到佢死訊好突然，如果時間許可我都想送佢最後一程。
亞視：重溫老臣經典劇
亞視副總裁葉家寶：亞視呢個星期日會有一個懷念驃叔嘅特輯，始終佢喺亞視效力咗二十年，到時希望聯絡琴姐（李香琴）、劉志榮同熊良錫出席，如果驃叔嘅家人需要幫忙，亞視都會幫手，稍後重會播映佢嘅經典劇集。
採訪：比華利、卓美娟
