恒指連升第8日，今回進賬176點，期指更勁，升244點。滙控（005）有份領漲，收130.50元，升0.90元，但對恒指升幅貢獻只係32點。
滙控終於識得「行」，炒滙控C輪，有米搵，問題係點樣揀，揀邊幾隻。
滙控C輪3400：本周二曾經推介隻3400，當時24.8仙，初時死吓死吓，跑輸其他，原因之一係街貨比較多（93%）。昨日，隻輪由24仙彈上32.5仙，升幅35%，1鋪番晒嚟。照公式計，隻輪理論升幅應該係5.4仙，𠵱家升夠8.5仙，升凸晒。可能又係同街貨多有關，因為發行商或者買番轉頭（前日街貨減少至84.4%），發行商當然亦可以買正股對沖。
隻輪4月初到期，負溢價0.2%，槓桿率40.2倍（有效25.7倍），引伸波幅13.3%，數據都仲係靚。但1日升幅咁大，下便嗰隻仲靚。
滙控C輪2228：2228收50仙，只係升得5.5仙或12%，慢過3400好多。
隻輪7月初夠鐘，溢價1.2%，槓桿率26.1倍（有效15.3倍），引伸波幅13.4%。有4個月命，趣趣哋，正股見140元，隻輪值1.30元，即係有權升1.6倍。滙控4個月內升9.50元，咪話冇可能。
章盛