因為一張賣樓紙，由舊年年底講到𠵱家嘅葵涌雍雅軒，長實梁焯鏗（窩輪梁）噚日急不及待向大家宣布，張紙終於到手！
蘭西諗，嚟緊幾星期，行家要小心喇，因為長實嘅宣傳攻勢會排山倒海，做到大家氣咳。今日已經要聽咩建築設計特色，星期日又call齊四大代理，拉行馬喺售樓處誓師。
窩輪梁話，宣傳推廣費要億五，最快下個星期中內購，諗住最多只賣一半，即四五百個，當然，如果好賣，就賣埋剩番嗰啲。代理噚日一聽到話可以賣樓，即刻話有大客圈圈聲咁買喎。不過，蘭西打聽返嚟嘅版本，好似連烏蠅都冇隻噃。
梁焯鏗話，𠵱家已經有超過十家銀行，爭住要做按。不過，蘭西記得，佢曾經講過，呢個盤係面對投資客，付款方法會遷就佢哋。如果係咁，樓花期長達十幾廿個月，投資客一般唔會樓花期上身。睇嚟，銀行如果諗唔到辦法鎖住啲客，今次呢個盤可能得個做字。
電郵地址：[email protected]