黎明昨日出席「雷頌德公益金音樂會」記者會，抽中在音樂會中唱《好心分手》一曲時說：「似乎快咗啲（指分手一事）！」認真唔老嚟！而前晚他的契媽小菁姐在中環擺生日酒，黎明與劉嘉玲專程到賀，未知是否因女友樂基兒未有同行黐實，臉口極黑。
黎明昨日到中環出席「雷頌德公益金音樂會」記者會，當雷頌德在台上以抽籤方式抽出歌手演唱甚麼歌曲時，與樂基兒熱戀中的黎明竟抽中《好心分手》，雷頌德即陰陰嘴笑說：「呢一刻唔係好啱，我驚佢冇feel唱。」令黎明十分尷尬，還以「趣致」來形容，並說：「似乎快咗啲（指分手一事）。」
事後黎明接受訪問亦有備而戰，揚言不介意演繹《好心分手》，問他會否感到難投入？他笑說：「時間會證明到我專業，呢件係簡單嘅事，係單細胞，如果我唔專業就會做出好多唔專業嘅事，好似車牌問題，自己都唔知乜事，知道就即時改，點知車房改錯咗做AL1001（正確是LA1001）。」
唔關自己事
對於有報道指樂基兒大肚，黎明卻表現得事不關己地說：「我對於唔關我事、同埋唔係我衍生出嚟嘅嘢，都唔會回應，以我理解，呢個經手人係個作者，俾佢作到大。總之黎明同樂基兒都有自主權，過咗二十一歲就自己決定，至於其他傳媒點報道及描繪，都係社會各界唔同睇法，自己都控制唔到。」
而黎明契媽小菁姐前晚在中環IFC商場國金軒食肆設宴賀壽，契仔黎明與劉嘉玲畀面到場，但二人表現南轅北轍，前者黑口黑面，後者卻四萬咁口。
讚契仔孝順
前晚八時多，嘉玲與一女伴先行現身商場，她明顯經過悉心打扮，一身珠光寶氣。相隔十分鐘，未有樂基兒陪伴在側的黎明單拖出現，他身穿便裝及牛仔褲，褲袋袋有一封利是，但一見有記者在場即時黑面及擰歪面，快步而行的他沿途被記者不停拍照，其間他忽然剎掣，企定定拍照後，即晦氣地向記者說：「影夠啦嘛？我唔鍾意行緊路被人影相呀！」直到十時多，手持大束鮮花的小菁姐才在黎明和嘉玲陪伴下離場，更大讚契仔：「黎明好錫我，年年都同我慶祝生日。」而黎明則向記者揮手示意不接受訪問。
採訪：駱華齡
攝影：娛樂突發組、陳偉權
