西九陰溝裏翻船，成為煲呔任內第二單唔可以完成嘅「重要任務」。連續兩次撻Q，中央睇怕都會對佢扣分啩，點知煲呔噚日出席一項公開活動，被問到呢個問題時，就話只要所有政策都用民意做依歸，一定會得到市民支持，繼而都會得到中央支持，自信心真係爆晒棚。
不過，八方真係想勸佢唔好咁老定，事關好多嘢都講唔埋。雖然煲呔已經比老董識做，破天荒喺兩會前接見人大政協代表，噚日更加開一場，為二十七號唔可以同佢傾偈嘅政協舉辦座談會，試圖安撫左派情緒，但只要佢再「輕左重右」，左派一定唔放過佢，都係小心為妙。
由傳媒舉辦嘅○五年特區施政十件大事評選，噚日就特別舉行咗頒獎禮，搵咗煲呔做頒獎嘉賓。可惜煲呔接替特首寶座，竟然輸咗畀世貿會議，得第二位，喺逾十萬投票者心目中，都唔夠世貿會咁巴閉，睇嚟煲呔都要向班韓農學吓嘢喇。
傳真︰2623-9278
電郵︰[email protected]