前年到英國繼續學業的左慧琪，因為跟外籍男友分隔兩地，難以維繫感情忍痛分手，不過左慧琪自與男友分手後不乏追求者，早前她返港度假時，便帶同英國結識的新男友見家長，以及到香港迪士尼遊玩。
現時在英國健身中心任職公關的左慧琪，原來已結交了新男友，早前她返港接受本報訪問時，更自爆今次亦有偕同新男友返港，她甜絲絲地說：「我哋喺英國結識，今次返香港，我都有同佢一齊返嚟，媽咪爹哋都見過佢，對佢印象幾好。」
做導遊四處逛
未知香港土生土長的左慧琪，今次返港可有充當導遊，帶男友四處遊玩參觀？她笑說：「當然有啦！我哋仲一齊去迪士尼樂園玩㖭！係就係地方細啲，但感覺都唔錯吖，當日我哋都玩得好開心！」
提升國際地位
左慧琪又抱不平地說：「之前我聽過好多人批評香港迪士尼，話地方好細，呢樣唔好嗰樣唔好，但香港咁細地方，都能夠擁有一個迪士尼樂園，我覺得好難得，全球咁多個國家，只係得美國LA（洛杉磯）、Florida（佛羅里達州）、法國、日本同香港呢五個地方有咋喎！而且，亦因為呢個樂園，令世界各地更加多人知道香港呢一個地方，提升香港國際地位，所以我覺得身為香港人好應該支持一下，唔應該猛踩猛咁批評，彈呢樣唔好，嗰樣唔好。」
採訪：戴彩煥 攝影：陳偉權 服裝：CalvinKlein
髮型：HairCulturebyByron 場地：CoffeeBerry
