搞酒會開Party，睇吓有乜賓客到，就知主人家嘅份量；好似噚晚中銀個新春酒會咁，可以用「冠蓋雲集」來形容，主禮嘉賓有中聯辦郭莉、孫明揚、任志剛、范徐麗泰、廖秀冬等，當然唔少得和廣北同中銀一眾高層。
到場嘅貴客，有新地郭氏三兄弟、新世界鄭裕彤鄭家純兩父子、信和黃志祥、鷹君羅嘉瑞、中原施永青，電盈蘇澤光、花旗陳子政、渣打蘇利民、金管局韋柏康、華創宋林、九巴陳祖澤、范鴻齡夫婦、馬力、查史美倫、夏佳理、周梁淑怡、李明逵、馮華健、詹培忠、藍鴻震……如果寫晒，都唔使寫其他稿。
和廣北同一眾高層，五點鬆啲就分兩排，企定定喺門口迎賓，咁都未夠，重專登喺行內精挑細選咗八個靚女員工，個個行頭十足，着晒專為今次酒會而度身訂做嘅旗袍，Set晒頭化重妝，喺總行3樓營業大堂招呼賓客，加埋不斷播放嘅中樂，真係好有擺酒Feel！
中銀公關同華華講，成個Show由迎賓、表演，以至食物，都係中銀自己一手一腳包辦，之前一晚，佢哋搞到凌晨兩三點，噚日朝早8點前就返去做最後綵排，事關酒會喺正銀行大堂開，9點後對日常營運有影響。真係一場群策群力嘅大Show。
李華華