小小超想買《信報》，係全香港都知嘅秘密。聞說有位地產富豪，俾人傳佢對《信報》都有興趣，馬上收到電話。而成個交易過程，好似有好多人匿喺枱底一齊傾咁，消息通街都係。咁究竟𠵱家進展點呢？最新版本係「心想事成」，極有可能下星期搞掂，而以李家二少為首嘅「財團」，會出二億八，果真係新春開心意頭價，林行止夫婦早前曾叫停，今次如果唔再臨門扭計，咁就搞掂！
派Morris專心搞傳媒
咁買咗《信報》之後又點搞？相信只有二少至知，而八方收到風，話電盈媒體董事Morris何國輝經已離開8號仔，脫離上市公司，專心幫二少做傳媒，首要任務就係埋班。八方問Morris係真唔係，佢只證實係離開咗8號仔，但仍然係幫二少打緊工，辦公地點由鰂魚涌搬咗去中環，佢會負責幫二少睇實啲媒體生意，尤其係睇吓祖國有咩發展機會。
咁二少入祖國做媒體，咪同老嗲個紅顏知己周凱旋撞到正？事關周小姐檔TOM仔，𠵱家最想搞就係呢瓣。咁你可以話係小小超硬撼周小姐，但八方就咁睇，塊餅咁大，一個人點都食唔晒，橫掂未開放，咪一齊煲吓囉。不過，奇在周小姐同二少啲口味原來好相似。
先講SUNDAY，話說當年SUNDAY廣告仲係好出位、個品牌仲係好正嗰陣，周小姐已經想買起佢，點知被人勸唔好買，係邊個就唔好講啦。總之，佢買唔成都撬走咗人哋個Marketing頭頭BingZeat入TOM仔，為TOM仔省靚個招牌。再講《信報》，幾年前經已傳周小姐想買，而佢亦聰明地以「每日都畀五蚊買《信報》」作回應，但實情就真係有傾過。而佢到底有幾鍾意《信報》？睇吓鮮有接受訪問嘅佢，肯答應《信報》做獨家訪問就知啦……咁睇，周小姐成日行快二少一步，但又係咪行得太過快呢？
快人一步理想達到
講番小小超，其實八方真係好佩服佢，皆因佢好清楚點樣可以逐步實現自己啲夢想，而且仲次次都青出於藍！好似做cyberkid嗰陣，買起電訊，再起多個數碼港；想做傳媒大亨咩，整個now，再買多份報紙，又食埋新電視；又如3G咁，失驚無神整招免費玩半年，連老竇都俾佢殺個措手不及；做屋企電話線同上網咩，迫到和記冇啖好食。就連起個貝沙灣，口碑都好過長實啲樓。如果八方係超人，除咗老懷安慰之外，真係唔知仲可以講咩嘞。
傳真︰2623-9278
電郵︰[email protected]