民建聯主席馬力前年選舉期間發現患上結腸癌，跟住就一邊選舉，一邊返咗廣州醫病。好彩最終保住議席，又保住條命仔，九死一生過後嘅馬力，身體都康復得幾好，噚日就度過五十四歲生日。
對馬力嚟講，健康梗係至上，所以八方問佢生日願望時，佢都係話「身體健康」，真係好啱。咁呢個生日又點過呢？壽星仔話冇乜特別，唔知係咪呢排太多嘢做，所以佢話今晚最好可以早啲瞓。咁又係，病人應該要休息多啲，先至可以好好回復體魄。
今次馬力康復得咁好，真係要多謝中央，事關馬力喺廣州一間著名腫瘤專科醫院治療時，據知中央就安排咗幾名超班腫瘤科專家為佢應診。當然，馬力都要多謝自己，事關佢喺病後都好注重飲食同健康，一概對無益食品sayno。八方都祝佢身體健康，希望今年煲呔激少啲民建聯，唔好搞到主席咁勞氣啦。
傳真︰2623-9278
電郵︰[email protected]