政務司司長許仕仁噚日真係忙，走足四場。一大清早搬寫字樓，由西座搬番去中座，其實以前陳太都喺中座辦公，只係老董唔肯搬上禮賓府，搞到大家要兩頭搬。
搬完辦公室，肥龍又趕上深圳，同行嘅仲有林D9。佢哋先到市長辦公室同市長許宗衡拜年問候，然後應市長邀請一同食晏。兩位老許上次會面已經一見如故，今次更加老友，所謂同姓三分親，肥龍就單刀直入同市長提及要加快喺蓮塘興建新口岸嘅建議，以及加快文錦渡嘅改造。
食完飯，肥龍就匆匆返港，今次雖然見唔到廖暉等京官，但係都算同隔籬鄰舍打個招呼報平安。下晝一回港，佢先去勞工界酒會，然後又去為七人欖球賽抽籤，到挨晚，仲去埋陳太媽媽靈堂鞠躬，真係忙足一日。
傳真︰2623-9278
電郵︰[email protected]