胡杏兒正在昆明拍攝新劇《太極》，由於取景地點偏僻，令她經常要到簡陋的屎坑如廁。但日前杏兒到花田拍戲時人有三急，奈何花田連屎坑都欠奉，只能由女助手把風下就地解決。
胡杏兒、趙文卓、林峯和馬國明等現於昆明拍攝無綫新劇《太極》，日內眾人將移師上海繼續拍攝。雖然昆明風光明媚，但因大隊每次取景地點路途偏遠，大多要數小時車程才抵埗，故眾人在如廁問題上較為尷尬，尤其女藝員更加麻煩。
日前杏兒接受本報長途電話訪問時笑說：「拍外景係咁㗎啦，呢次經常都要面對好恐怖嘅廁所，係名副其實嘅屎坑，但都冇計㗎。」
有次杏兒隨隊到當地一花田拍戲，但花田連屎坑都沒有，只能就地解決，她說：「都有個女助手幫我睇住，又唔會好驚嘅，啲花田長得好高。」
問她會否擔心被偷拍？杏兒笑說：「小心啲啦，明知有記者就梗係唔會啦，我又唔會去啲太空曠、冇嘢遮嘅地方，花田唔會有廁所，都係迫於無奈，呢樣好正常啫，當係肥料囉。」
不過，杏兒在拍攝時卻搞笑地在花田撻低，她說：「嗰場戲要我喺花田跑，愈跑就愈斜，拍拍吓就見唔到我，原來係我仆低咗，因為啲泥好濕，好彩我雙手落地，所以冇事。」
趙文卓晒幸福
基本上，今次大隊在衣食住行待遇不錯，惟獨因昆明食物較油膩，故杏兒便以四元人民幣購入一樽腐乳，沒想到竟大受歡迎，她說：「我哋自備腐乳、榨菜片、豆豉鯪魚，成班人勁開心，一餐食晒成樽腐乳呀。」
此外，趙文卓日前承認今年將與拍拖三年半的內地女演員張丹露結婚，杏兒卻未有聽聞，她說：「佢女友有嚟探班，我梗係羨慕佢啦，個老公咁叻，但每個人追求唔同，我都係揀工作先。」
採訪：朱倬誼
