任何一個有常識嘅人都會知道財政預算案係一大班人合作結果，絕對唔係唐少一人嘅個人功德。不過話雖如此，唐少係整份財政預算案嘅靈魂，如果佢話主調話要減稅，就唔應該響篇稿入面話要大花筒；如果佢話小政府係好事，就唔應該自掌嘴巴話要用公帑創造職位。
利世民怪唐少，更加怪佢個寫手。佢嘅發言犯駁多唔在講，最大問題係奄悶。點解會咁悶？因為無中心思想。點解無中心思想？因為個寫手唔係全心全意相信自由市場，又或者佢唔明白究竟唐少嘅理念係邊科，又甚至乎佢一心以為可以面面俱圓，結果就累到老闆四面受敵。睇黎唐少要認真諗諗，究竟以後啲稿係唔係要搵的志同道合嘅人幫手。
搞到人人唔開心
響政壇如想令每一個人都開心，結果就會令到每一個人都唔開心。今次財政預算案，就係想人人都有啲得着，結果就搞到人人都唔高興。有老友話某個政黨少爺黨魁，本來係唐少多年戰友，不過聽完財政預算案之後，就非常之不屑咁講咗句︰「佢𠵱家都變咗當奴嘅乖乖，唔使旨意佢07年出嚟爭啦！」
至於其他左中右政見就更加唔使講。要政府加開支個啲就話預算案忽略民間疾苦；要政府減稅嘅自由市場中堅，就話唐少去得唔夠盡，對佢呢次減稅「濕濕碎」表示失望。
利世民嘅立法會線報話唐少減稅要就住就住，係要留啲糖畀曾特首響十月施政報告派街坊。鬼子佬萬聖節就話派糖啫，曾特首使唔使啊！？人在官場身不由己，唐少今次左右為難，雖然利世民深表同情。不過其實唐少如果真係有絕頂政治智慧，就會堅定不移落實減稅，相信呢種勇氣絕對會贏得中南海諸公賞識。老實講，唐少隱隱散發着美國小布殊氣味，特別係佢嘅笑容同樣有一份天真，講唔定佢都可以做香港領導人！
利世民