噚日2.22，係立法會議員梁家傑同問責局長馬時亨牛一嘅好日子，大家喺立法會相遇，當然互相恭喜一番。肥馬五二年生，比傑哥大六歲，唔講唔知，今日係馬力生日，馬力細馬時亨一日，今年都係行年五十四。
八方問傑哥，西九打咗場漂亮嘅勝仗，應該好好慶祝，佢就笑話唔好再提西九。生日會同屋企人食飯，願望係身體健康，多啲時間陪家人。傑哥拒談西九，但係佢大師兄馬丁噚日正式送咗個「梁西九」嘅外號畀佢，話佢來自九東，但係西九都掂。
肥馬噚日因為要幫唐唐推銷財政預算案，成日都好忙，夜晚同太太及女兒出街食飯慶祝。至於生日願望，都係身體健康，當然做好份內工作亦好重要。肥馬話一向生日都好少慶祝，但係啲同事都同佢開咗個小party，民建聯陳鑑林仲送佢一張生日卡，李少光亦有恭喜佢，又幾溫馨。
傳真︰2623-9278
電郵︰[email protected]