一手創辦ASM太平洋嘅林師龐（圖），噚日喺業績記者會上，突然宣布佢同個仔寫咗一本書，叫《SoaringLikeEagles》，內容講ASM過去30年，點樣爬上全球半導體裝嵌同包裝設備呢一行嘅龍頭位置，各商學院可以搵嚟做教材，過來人講一手料，應該有參考價值。
林師龐話ASM過去30年從未蝕過錢，唔係咁多公司做到，就連佢哋嘅大客仔Intel都冇咁嘅紀錄。公司嘅成功因素，佢簡單概括為天時地利人和，就係睇準行業起飛步伐，配合鄰近地區同國內嘅低成本優勢，仲有不斷創新同跌倒再爬起嘅精神。林老闆話ASM每年投放喺科研嘅開支達收入嘅10%，而市值已達21億美元，等同佢全球四個主要競爭對手嘅總和，即係贏人成條街。
呢本書唔係志在賺錢，收益將捐畀突破機構做慈善用途。