預算案平淡如水，其實已係意料中事，股市亦冇反應，全日在窄幅內上落，不過，只係藍籌股係咁，中資同國企股就繼續大受追捧，成個市「側埋一邊」。
金融同原料股係最突出兩瓣，前者大升嘅有中國人壽（2628）、交通銀行（3328）同中國財險（2328）等，升幅由4.1%至6.5%不等；後者有中國鋁業（2600）、鞍鋼（347）同江西銅（358），升幅由4.1%至9%不等，交投更加係賓虛咁嘅場面。
H指收6717，大升148點，又創新高，今次大戶精心策劃國企呢個大升浪，肯定要食到盡，升勢有可能延續到下個月，有排玩。家吓國壽、交行同財險都已齊齊創出新高，建設銀行（939）噚日收3.775元，僅升2%，遲早又會爆炸性上升，要吼實。
先睇走勢，建行由月初的3元起步，上周升到3.85元才唞氣，呢幾日形成上升三角形，一升破3.775元阻力，又會再衝刺，照度上去，上升目標指向4.65元。
追貼交行可見4.7元
建行會否升見4.65元？機會好大。建行上市價2.35元，噚日收3.775元，升幅係60%；交行上市價2.50元，噚日收5.05元，升幅係102%！建行同交行相比，升幅遠遠落後，日後好大機會追番貼交行，以上升1倍計，股價剛好見4.70元。
建行將會係首隻H股晉身成為恒指新貴，未來半年，在傳統基金大手吸納的支持下，建行股價勢易升難跌。手上最新的大行研究報告係雷曼所出，目標價係4.10元，相信日後會有更多大行推出建行將「染藍」後嘅目標價。
內地地產股噚日又見有番勢，中國海外（688）、北京北辰（588）、華潤置地（1109）同越秀投資（123）都有進賬，但睇走勢，則以新世界中國（917）最引人，家吓上升三角形已行咗兩個多月，一升破3.65元，上升目標直指5元。
新中現有土儲1.7億平方呎，比中國海外的1.2億平方呎還要多，基金同大行既然做得起中國海外，點會放過新中，睇個勢，相信時機已成熟。新中去年供股後，每股資產值6.18元，股價講緊大折讓42%。
郭兆誠