文化打哈哈:叫金培達搞西九

文化打哈哈:叫金培達搞西九

講真,西九係特區政府想裝身之作。冇嘅,人要衣裝,扮靚靚咁有乜唔啱先?衰在你使嘅唔係私房錢而係公家錢?但係你又指定要一個裁縫,重要規定一定要擔天遮,之前仲要裁縫先落三百億大洋至肯畀佢度身,咁個裁縫梗係話小姐身體嬌好,在下豈敢竊玩。
𠵱家中場休息啫,用啲乜乜委員會頂住先,跟住再鑼鼓;人哋要連任,咁咪多一事不如少一事囉,明冇?
以上講亂局,不如講吓定局。金培達攞獎呢個定局就肯定冇得推倒。
大家都等住睇李安攞奧卡,點知金培達搶先話畀我哋知:香港人都唔係嘢少㗎!
我幾個月前睇過佢有份作曲嘅《唯獨你是王》首演。我女朋友係教徒,係都要拉我去睇呢套音樂劇。算啦,去囉。點知鬼咁好睇,三個鐘由頭唱到尾,真係有料到。
噚日蘋果娛樂版話金培達攞獎,套戲就乘勢重演,少少更正,佢哋係一早預咗重演嘅。之不過今次一定爆到七彩。好事吖。
我好肯定金培達搞呢套戲係冇錢收嘅,政府亦冇畀過一蚊佢去為電影配樂。
攞獎講到底係靠自己。所以冇西九係唔使死嘅。
不如就叫金培達搞西九。佢捱過世界,一定知道點至可以幫到一個地方嘅文化藝術發展。佢肯定有新思維,肯定冇官商勾結。
唔係講笑㗎,佢肯嘅大家一定拍掌。
不過我知佢會話:「搞西九?咪搞我,不如我作首歌畀大家,嗱,西九,西九,西九……咪搞,咪搞,咪搞……。」
觀火

傳真︰2623-9278
電郵︰[email protected]