富豪聚居嘅深水灣香島道噚日朝一宗輕微交通意外，引致交通大擠塞，車龍伸延到二百呎外，搞到近排俾《福布斯》選為大中華首富嘅李嘉誠冇得坐車，要紆尊降貴行路擺脫車龍。
事緣一身高球裝束嘅誠哥當時親自駕駛寶馬房車，去住所附近嘅香港高爾夫球會打波，但遇到大塞車，啲錢秒秒鐘天文數字上落嘅佢，當然唔會坐喺度白等，誠哥即時落車行路五十呎到球會，架車畀其他保鑣駛走。佢仲貪方便唔用高球會正門，改喺停車場擒過三呎高石壆入球會。啹喀保鑣就好醒目咁幫老闆攞住啲裝備，貼身護送同行。
李超人事後同現場記者八吓點解咁塞車，先知道係交通意外引起，就茅塞頓開咁「哦」咗一聲，然後面露笑容向記者揮手道別。
傳真︰2623-9278
電郵︰[email protected]