三人行，尖沙嘴搵食，嗌交着晒火。Johnny火都嚟埋：「我要食日本菜，要食脆卜卜燒飯糰。」Kristy青筋暴現：「唔得，我要食Pizza，重要係海鮮味嗰隻。」我下結論：「咪嘈嘈閉，等我帶你哋歎燒飯糰海鮮Pizza……」我無吹水，有日本餐廳真係用傳統日式燒飯糰整Pizza，賣相脆卜卜硬硬哋當飛碟玩都重得，「唔夠喉重有日本珍珠米Crossover中國臘肉嘅煲仔飯糰，服未？」「……」「唔拗喇咩？重唔跟住嚟搵食？」
記者：李智聰 攝影：陳智良 模特兒：Johnny、Kristy（Salvador）
創新意吸引食客
目的地係「匠」，呢檔日本料理走中高檔路線，刺身由日籍師傅主理，爐端燒都不俗。論裝修環境，柔和燈光坐得幾舒服，最過癮係設有多間榻榻米房，啱晒大班Friend攞間房慢慢Hea。
為食Kristy同Johnny屁股都未坐暖即問：「又話試新嘢？速速擺上枱吖唔該！」爐端燒師傅Roger代答：「我用日本燒飯糰做材料，整咗Pizza、做埋壽司、又攞嚟放湯，重溝咗啲臘肉落飯糰度，等陣間食真啲，啲壽司裏面有餡㗎。」日式燒飯糰做材料，完全為咗迎合香港人口味，事關燒飯糰脆卜卜，入口爽脆，而且容易配搭，「𠵱家啲客食嘢好睇賣相，就咁一嚿燒飯糰唔搶眼，燒到硬硬哋脆卜卜成塊Pizza咁就唔同嘞，成隻飛碟咁個Look都過癮啲喇。」
珍珠米海鮮燒薄餅$58
珍珠米搓成餅狀燒至香脆後，加三文魚、吞拿魚、甜蝦等魚生海鮮喺面，再落洋葱、紅青辣椒等薄餅基本配料，入爐焗完唧上沙律醬即成，入口香脆食法新鮮可口。
煲仔飯糰$58
概念源自煲仔飯，珍珠米混臘肉粒搓成飯糰，燒至四邊香脆變成飯焦，咬落卜卜脆，雖然入口好似有啲油膩，不過真係好味到難忍到口。
番薯茸燒飯壽司拼盤$218
壽司全部內有乾坤，珍珠米包番薯茸先燒15分鐘，待香甜番薯茸溶入乾脆珍珠米當中，然後放三文魚、牛脷、鰻魚、帶子、薄雞片及蘆笋冬菇等，用火槍灼熟，面頭再放上蟹子等作調味。
匠燒飯糰$32
大蝦炸成天婦羅後第一時間用珍珠米包成飯糰，以保持溫度，再把飯糰放上爐燒至金黃色即可。天婦羅加上燒珍珠米，爽夾香。
脆皮湯飯$28
珍珠米燒成飯焦後切碎做配料，放湯食同樣可口。湯底含木魚水、綠茶、日本豉油及少量煮酒，飯焦放湯後難得仍有咬口。
三文魚皮薄燒珍珠米$48
今次將珍珠米搓成片狀，燒至香脆，外層鋪三文魚皮再燒一次，三文魚皮同珍珠米同樣愈燒愈脆，入口嗦嗦聲，愈食愈開胃。
同場加映
講到創新，除咗用飯，Roger一樣有計，原來佢喺串燒名店南蠻亭出身，睇吓師傅嘅串燒有乜新意，重有乜嘢新搞作先！
車打芝士肥牛串 每串$35
肥牛包英國車打芝士做串燒，加熱時芝士溶入肥牛上，令肉質更加鮮香。
車厘茄燒雞肉串 每串$15
挖出車厘茄肉釀入雞肉再燒，果汁同肉汁互相交融，多水多汁好Juicy喎！
豚角煮$40
豬肉先燜５小時，加日本豉油，煮酒、味醂等配料再燜一次，豬肉勁腍入口肉汁四射。
食客有Say
個海鮮Pizza好得意，啲飯卜卜脆好爽，個賣相又吸引，材料都幾豐富。
成日出街食飯唔知食乜，知道呢度有新菜咪嚟試吓囉！都幾好食，我鍾意食呢度嘅肥牛串燒。
匠（23693939）
地址：尖沙嘴堪富利士道8號格蘭中心地下G04-05地庫
營業時間：12:00pm-3:00pm，6:00pm-1:00am
座位：120個
