一日之間，西九忽然由地產項目，變成文化主導，肥龍懶得孭飛，以後就要靠肥平撐住。可惜肥平一向被人認定做嘢唔掂，所以佢一孭起呢壇驚世巨獻，就有好多冷言冷語，睇死佢會神遊太空完就當交差；做局長做到咁，相信肥平都好無癮。
肥平噚日先後上兩個電台節目推介西九，講到由肥龍擔任主席嘅西九諮詢委員會，會由約二十人組成，名單最快今個星期落實，預計下月成立；又話轄下嘅財務小組會研究點樣支援西九持續發展同埋經營。比起平時，已經算畀咗大家好多料㗎喇，而且連走兩場，都算勤力咗好多。
鬧肥平漠視粵劇界
點知身為全國政協嘅汪阿姐聽到肥平講嘢，仍然好唔滿意，揸揸吓車都要打去商台烽煙，由西九扯到去粵劇發展，對肥平連番發炮。汪阿姐嬲嬲哋咁話，政府至今都無回覆過粵劇界，究竟會唔會為粵劇設立永久場地？皆因新光戲院租約期○九年屆滿，高山劇場又唔適合搞粵劇，咁佢哋班粵劇人士可以點呢？
肥平回應時就話，其實西九長遠會設置永久粵劇場地，預計最快二○一二年落成，重撐政府已經調整租賃場地政策，會盡量將康文署管理嘅場地租畀粵劇界使用，希望汪阿姐息怒。可惜汪阿姐唔肯收貨，仲插多佢幾刀，話如果真係要等到西九落成，先至有粵劇場地，咁佢就肯定「到退休都唔會睇到」，聽眾真係喺空氣中都聽到佢發火。
粵劇發展諮詢委員會主席周振基同八方講，汪阿姐都係愛之深、責之切，好明白點解佢咁勞氣，但希望粵劇界人士冷靜，畀多啲時間政府，佢仲帶畀大家一個喜訊，原來高山劇場新翼，嗰個專門畀粵劇界做培訓同練習之用嘅地方幾乎搞掂，粵劇界可以有多個地方用。
其實講嚟講去，一切批評，都係外界對肥平無信心所致。前日泛聯盟石禮謙喺立法會大鬧肥平無文化政策，話佢講佛偈，一時務虛，一時務實，據聞好多人都拍爛手掌，石禮謙噚日嫌唔夠喉，繼續同八方話肥平做得唔好，睇嚟肥平真係「不得民心」。
有文化界人士就話，由肥平搞西九，即係預咗搞唔掂啫，實行睇死肥平。查實煲呔連任時，已經盛傳想叮走肥平，肥平苦苦哀求下先有得留低。既然個位咁難得，肥平睇怕都要爭口氣，先可以繼續喺曾班子中生存。
傳真︰2623-9278
電郵︰[email protected]