近四十名無綫經理人合約藝員，前晚於將軍澳出席公司舉行的春茗，影大合照時，郭晉安及宣萱成左右護法傍着副行政主席梁乃鵬，盡顯一哥一姐的地位。而吳卓羲獲悉被樂易玲力捧即說：「吓？咁咪即係要繼續辛苦。」認真身在福中不知福。
無綫經理人合約藝員前晚在將軍澳設宴七圍舉行春茗，近四十名藝人出席，影大合照時，由戲劇分部總監曾勵珍負責安排眾藝人排位，坐在正中間是電視廣播有限公司副行政主席梁乃鵬博士，伴在他左旁的小生分別是郭晉安、陳豪及鄭嘉穎等，而右邊花旦則是宣萱、黎姿及佘詩曼，郭晉安和宣萱盡顯一哥一姐地位，而宣萱及黎姿等更是主家席的座上客。
小花性感爭艷
一眾當家花旦都打扮密實，反而一班小花如陳法拉、楊秀惠等則性感亮相。問及今年打算力捧哪一些藝人時，製作資源部副總監樂易玲說：「會捧啲唔係太多人識嘅藝人，今年世界盃舉行，𠵱家正構思搞足球小將，初步有黎諾懿、高鈞賢、司徒瑞祈及蔡琪俊等，或者再加楊秀惠同陳法拉，其他好似鍾嘉欣、吳卓羲、鄭嘉穎、廖碧兒、黃宗澤同陳豪等都會繼續捧。」
安仔否認求婚
當吳卓羲得悉樂易玲點名力捧時，即語帶輕佻地說：「吓？唔係啩？咁即係要繼續辛苦，不過都開心嘅。」問到目前正多棲發展的吳卓羲，可覺得分身不暇？他說：「係公司安排，之前有電影搵我，但都冇期推咗，所以都有損失。」至於損失多少，他說：「唔知，唔敢問價錢，費事傷心。」
一哥郭晉安被問及有否在泰國向女友歐倩怡求婚，他說：「唔使特登搵一個地方，唔需要，而未來三年都未有打算結婚，想喺事業上做多啲嘢先諗。」
採訪：楊潔雯、卓美娟 攝影：仇志德
