夜晚睇完《難兄難弟》笑到騎騎聲，之後再睇埋歐聯夢幻之戰，免費！但幸福唔係必然，畀錢先有好嘢睇逐漸變成事實，因為一眾收費電視台已經等齊人，亮招爭客人。可以喺電視睇到日本重上緊嘅日劇、睇戲可以好似睇碟咁倒前跳後、會考生重可以睇「會考無難度」精讀節目問功課、重有四年一度令球迷乖乖畀錢捱夜嘅世界盃。最新消息重有NOW同新電視合作，有NOW可以睇埋新電視，睇嚟收費電視嘅戰國時代已經正式開始喇！
記者：馬慶武
攝影：伍慶泉
咪心急：裝新電視Hold住先！
各台有新招，最新絕招玩合作，喺6至8個星期之後，透過NOW寬頻電視就可以睇埋新電視節目，8條收費頻道包括無綫新聞台、精選劇集台、tvbQ、無綫音樂台、無綫大劇院等，兩個台加加埋埋節目重多過老大哥有線。不過詳細合作細節暫時都重未公布，合作後價錢會唔會改亦未知，據知會係類似𠵱家NOW申請新台一樣，每一個台或一系列台收取獨立月費。睇嚟想申請新電視嘅可以Hold住，因為申請NOW寬頻，一個解碼器一個遙控就睇晒兩個台！唔急用嘅，梗係等多一個月先啦！
新電視
首創日劇同步播
成件事好勁好破天荒，日本先播到《西遊記》第6集，香港今個月26號就有得睇。雖然慢咗個幾月，但已經係港人喺電視睇日劇以來最緊貼一次。呢套日劇版《西遊記》有香取慎吾加電車仔伊藤淳史主演，重有木村拓哉客串，卡士夠份量！
吸引度：★★★★（5★為滿分）
除日劇外，重有懷舊無綫劇，「大劇院」台嚟緊就有「我們的汪明荃」系列，包括《萬水千山總是情》、《楊門女將》等，裝嚟畀阿媽睇扮孝順。提一提，以上節目都證實咗，兩個月後會加盟Now，到時再畀錢就可以睇埋。
NOW寬頻
節目飛住睇
開始向球迷埋手嘅NOW，一邊愈嚟愈多波播，一邊狂谷新推自選台。自選台包括兩個電影台、一個電視劇台，最強功能係可以隨時睇，唔使跟節目表，可以「飛」嚟「飛」去睇，同睇碟一樣，畀多$15一個月就有。
吸引度：★★★
最新推出嘅電影就有《黑社會》，電視劇就有韓國嘅《飛天舞》，都算新，而且重有大量想睇吓又唔想買（碟）嘅港產片，支持本地原創嘅電影人，裝得過！
街坊：合併有計噃！
有線 世界盃又埋身
財經、娛樂、新聞、電影，收咗錢好耐嘅有線電視，節目發展算係好全面。但對年輕人嚟講，最吸引始終係直播體育節目。宣傳語句──「世界盃又在有線」，擺明橋唔怕舊。球迷們又真係每4年就會瘋狂一次，就算明知睇唔晒，但屋企裝咗又確實會安樂啲。
吸引度：★★★
為迎接世界盃嘅新搞作已經開始，最新就有搵嚟杜汶澤主持嘅世界盃節目《世界盃啟示錄》，得啖笑當世盃前菜囉。
數碼電視 睇電視補會考
會考生總有一個喺左近，所以香港寬頻嘅數碼電視就喺呢刻強推會考節目。搵嚟扮《無極》嘅「會考無難度」（當代書院）Miss、阿Sir主持，除有貼題目環節外，重有問功課時段，重分埋唔同科目唔同課程，隨時重溫，真正可以睇住電視溫書，相信係唯一阿媽舉腳支持睇嘅電視節目。
吸引度：★★
睇電影NOW最新！
暫時嚟睇，黑社會出咗碟無耐就有得播，Now寬頻電視嘅電影似乎最新鮮熱辣；有線就勝在多元化，基本電影台已經有齊動畫、西片、港產片；最舊嘅係新電視，但新電視呢個岩井俊二系列，精選舊片集合反而吸引；數碼電視嘅「首輪猛片」竟然係《凶氣之櫻》、《青芥刑警》……爭啲可以放喺明珠930播，可能數碼電視志不在電影台啩……
新一期電影新舊比拼（香港上映時間）
Now寬頻電視
《黑社會》（2005）
《大丈夫》（2004）
有線
《貓之報恩》（2003）
《芝加哥》（2003）
《金雞2》（2003）
新電視
《青春電幻物語》（2002）
《四月物語》（1998）
數碼電視
《凶氣之櫻》（2003）
《青芥刑警》（2002）
記者親身試──幫襯攤檔唔同價
如果犯法自首，多數可以坐少幾碌，但自己打電話去申請收費電視可能有蝕無賺。旺角街頭、屋邨成日都會有人擺檔拉客，一早聞說幫襯呢啲攤位登記，往往都有着數價，可能有某幾個月免月費，又可能免安裝費，月費重隨時平廿蚊！記者親身測試，發現有啲就兩邊一樣，有啲電視台就打電話去申請重着數，想知點？即睇右表！
攤檔有無着數？
電話有數！有線：電話申請送HBO
電話：1832888
月費：$239（需簽約18個月，送Motorloa手提電話，筆者發現打電話申請同攤檔月費一樣之餘，熱線Sales哥哥重話送3個月HBO畀筆者，價值$240！）
安裝費$150（現申請免安裝費）
解碼器月租：月費已包
裝NOW有數！新電視：攤檔價每月慳$50
電話：31682888
月費：原本月費$198，攤檔價$148，需簽約15個月，首3個月免費，但只限攤檔所在嘅屋邨。
安裝費：現申請免安裝費
解碼器月租：$15
數碼電視：找勻成個旺角唔見有攤檔
電話：35661000
月費：$128，首6個月免費，合約期18個月，唔多見有攤檔，而且好似好多地方都未有覆蓋。
安裝費：現申請免安裝費
解碼器月租：現申請免月租
兩邊一樣！Now寬頻電視：電話街價一樣
電話：28881888
月費：$154熱線價（最低收費，需簽約18個月，送半年3G服務及手提電話，重有買台一送一服務，送乜台任揀，最多送8個台）；攤檔除咗呢個$154外，另外Sell一個Plan$138，同樣簽約18個月，第1、6、9個月免費，慳3個月月費，但無3G同手機送！亦無買台一送一！）
安裝費：$530（現申請免月費） 解碼器月租：$30（現申請免月租）