上星期五晚上，睇有線新聞，見到工聯會議員王國興帶領一班建築工人到禮賓府門外示威，喊口號，陳婉嫻都上埋禮賓府打氣。有如此場面，左丁山心諗張建宗與房屋署署長陳鎮源有難矣，咁多人由工聯會帶住嘈，曾特首在禮賓府內豈會瞓得安樂，以佢咁識政治，實會眉頭一皺，計上心頭，要房屋署墊支工人薪水，以後再向德信建築追番。
後來閱報，果然如此。與地盤總監惡佬明講起，佢喟然而嘆：「建築公司欠判頭薪水，當然不可原諒，但根據合約及過往慣例，房屋署冇代建築公司支人工嘅規矩，𠵱家工聯會識帶工人到禮賓府嘈，就可以令房屋署破例，咁即係點？靠惡就得啦，以後建築工人唔好咁斯文嘞，有事就走去禮賓府門外示威、靜坐，向曾特首施壓力，曾特首就會向負責勞工事務嘅張建宗施壓力，向房屋署施壓力，工人於是得咗。」
一味靠惡就掂？有冇其他因素呀？政治記者Ｂ同左丁山講：「唔好咁天真，由李卓人或陳偉業帶工人去嘈，多數唔掂，曾特首會瞓得好安樂。」欠薪就是欠薪，王國興與李卓人都係工會派議員，點解李卓人唔掂？政治記者講：「有兩大分別，第一，李卓人係民主派，即係定性為反對派，特區政府唔會畀面，且要打擊，削弱佢哋嘅民望；第二，工聯會與曾特首可以有政治交易，譬如工聯會在立法會支持特首，唔反對在添馬艦興建政府總部，更何況，你都知啦，工聯會背後靠山夠晒大，李卓人背後一片空虛！」
咦，如此說來，以後並非一味靠惡就得喎，發惡之時，要搵埋靠山至得。政治上，房屋署呢次破例講人情，立下危險先例，打擊法律精神，十分危險。啲官員以後唔使依例辦事咯，樣樣拖住，等上頭下政治決定便是，夠膽堅持原則辦事之官員，容乜易踩正香蕉皮。