省招牌要幾錢？有人用一千幾百萬，結果都係得個桔；但有人識得睇時機，只係用有限銀両，就廣收宣傳之效！好似鷹君集團，趁噚日財政預算公布，喺旗下嘅花旗銀行廣場免費請人飲咖啡。集團助理董事李澄明仲親自督師，兩粒鐘派咗超過千五杯，以每杯20蚊計，都係三幾萬，但贏晒口碑，計落都幾超值。
李澄明神機妙算，早前喺電視睇到唐唐同觀眾拜年，講咗句「心想事成」，就預計到財爺應該有好消息公布，咪諗住搞吓新意思，等大家開心吓囉！咁點解咁大細超，淨係請中環啲人，旺角朗豪坊又冇呢？佢笑笑口話，呢度近政府總部同唐唐，附近又多金融財經人，所以揀呢度；至於派咖啡，咪就係因為最多人鍾意飲囉！
最開心嘅，除咗李生之外，仲有飲免費咖啡嘅人，同埋接呢單生意嘅PacificCoffee。喺正隔籬嘅Starbucks就慘喇，事關生意多少都有影響。李澄明即刻補飛，話同每個租客都有唔同嘅合作，次次唔同，大家關係好好，好公平。
華華問李澄明，對個預算案有乜睇法？身為中產嘅佢話，提早滅赤係好事，都戥同事開心，因為供樓退稅有得延長，又話財爺係審慎理財，今次行咗第一步，之後經濟再持續向好嘅話，相信會繼續鬆手。咁到時係咪有免費翅食呢？
李華華