雜誌《福布斯》（Forbes）中文版將會喺下月九號發布新一期嘅「福布斯中國名人榜」，入圍標準係計全年收入同曝光率，內地有報道話最近聲名大噪嘅超級女聲李宇春同張靚穎會打入名人榜嘅前一百名。今年《福布斯》重設咗三個新獎項，分別係○五年度明星、年度新星同○六潛力明星，有消息話李宇春喺年度明星嘅票數好高，而最大勁敵就係上年喺荷李活大出風頭嘅章子怡。
張靚穎潛力無限
至於張靚穎，有傳佢以過半票數喺○六潛力明星獎領先，有內地記者訪問咗雜誌中文版嘅負責人楊小姐，佢話李宇春同張靚穎喺上年有超高嘅曝光率同奪目嘅表現，至於佢哋嘅收入，亦有專人調查後作出專業評估，佢兩個冇乜可能入唔到前一百名，重話名人榜一定有超女份，但有幾多個可以上榜，就要到下月八號先至有結果。而上年嘅名人榜前三名分別係姚明、章子怡同劉翔。