又係H股天下，H指大升148點，國內保險股領漲，升到出煙，𠵱家先至高追佢哋嘅C輪，提防風險，如果落場，注碼最好就住就住。
恒指微升8點，搵落後藍籌C輪埋手，風險冇咁大，撞起板上嚟都冇咁傷。
中銀C輪3670：中銀（2388）最低15.30元，收15.45元，進賬1格。建行（939）與交銀（3328）又試再炒，中資背景嘅中銀，相信唔會長期不動如山。買中銀C輪，贏面大過輸面，搵細細粒嘅3670埋手。
3670今年10月尾夠鐘，大把時間，輪價10.2仙，溢價3.7%，槓桿率15.2倍（有效8.3倍），引伸波幅20.2%。
講數據，9777靚絕，6月初到期，輪價1.02元，溢價得0.3%，槓桿率15.2倍（有效10.6倍），引伸波幅18.8%，但買賣唔易，得12萬易手。鬼咩，隻輪街貨得6.7%，即係20球，交投自然難以熱鬧。
網通C輪9515：網通（906）𠵱家唔係藍籌，但下月6日起則加入成為恒指成份股，吼低揸C輪。網通C輪幾乎冇得揀，得隻9515睇得上眼，4月尾夠鐘，輪價2.20元，溢價2.3%，槓桿率6.3倍（有效5.2倍），引伸波幅42.2%。因為屬「大價輪」，唔係個個鍾意。
章盛