將軍澳一度係樓市重災區，隨着一手貨被消化得七七八八，物業陸續落成入伙，變成商機無限，各大代理行都諗計搶奪市場佔有率。香港置業就先行一步，喺將軍澳地鐵站租到個舖做資訊中心，增加公司曝光率。
個舖近君傲灣一邊入口，一日咁多人出出入入，真係好過賣廣告。
港置攞到呢間舖都唔易㗎，出動到六位數字嘅月租，令地鐵難以抗拒至掂，裝修細節都要跟足地鐵嘅規定，些小都唔改得，聽講啲規則有成本書咁厚。間舖又限定唔能夠做生意，返工嘅前線都要執到正。
呢個係地鐵將軍澳線車站內，第一間畀代理租用嘅舖位，約五百呎，租期兩年，今個禮拜開張。香港置業執董李志誠話，個舖係集團喺將軍澳區最貴租分行，此舉係為加強公司形象同力攻二手市場。
港置營業董事王品弟話，集團喺將軍澳區暫有八間分行；唔計呢間資訊中心，今年計劃增開四間分行。
電郵地址：[email protected]