早一排股價無端插水嘅多隻二三線股好似華彩控股（8161）、中國水務（855）等，昨日齊齊玩反彈，中國水務就升咗15.69%，收1.18元，至於華彩亦升13.54%，收2.125元。
雖然係咁，但經紀黃仍然話升勢唔容易維持，佢話兩隻股近排都繼續努力同投資者會面兼推介，不過因為股價曾經大散過，保守嘅傳統基金肯定會有猶豫，或者勇猛嘅對沖基金會候低吸納，但唔好忘記佢哋快手快腳，有錢賺隨時會食糊沽貨，所以相比起以前難玩咗好多，未必適合一般散戶。
另外，打印機產銷商映美控股（2028）舊年年中上市以來一直都好靜，自從無耐前出現咗一些大手成交後，股份交投明顯暢旺咗，就連新聞都多咗，好似剛剛就話被選為廣東省稅務局的稅控收款機供應商之一，據講唔止咁，好似仲話帶證券界人士北上睇廠。
由於做多咗嘢，所以近日市場亦多咗人留意映美，隻股近排最高見過1.58元，昨日最低跌至1.40元，收1.46元，跌咗3.3%。
不過小初見人哋既然咁積極，斷估唔會無下文啩。
慕容小初