將於下月成為豪門快婿的無綫藝員吳家樂，自與其士集團太子女周蕙蕙傳婚訊後，前晚風騷地首拖未來老婆大人遊中環，先睇時裝騷，再歎日本菜，在人前拖手攬腰大晒恩愛。雖然大婚在即，但吳家樂竟以一個「亂」字來形容婚禮籌備進度。
三十四歲的藝員吳家樂與家族總資產逾五十億的其士集團太子女、三十八歲的周蕙蕙，於下月十九日舉行婚禮，二人拍拖期間表現低調，但即將踩入豪門的吳家樂難掩喜悅之情，前晚首次偕未來老婆大人公開亮相，拍拖到中環睇時裝騷，再去食飯，連踩兩場。
「婚禮得個亂字」
前晚吳家樂與身穿套裝、打扮斯文的周蕙蕙手拖手出席在中環Zenses餐廳舉行的TheSwank時裝騷，兩人到場時笑容滿面，吳家樂更風騷非常，但他強調非首次攜眷亮相，他說：「唔係第一次，影咗好多次啦！」問到籌備婚禮進度，家樂笑說：「婚禮？𠵱家都係一個亂字。」
吳家樂又否認在酒店行禮是為避開傳媒，他說：「喺婚姻註冊署得五分鐘，好短時間，冇乜意思，我哋想莊嚴啲，多啲人見證。」問他婚後能給周蕙蕙甚麼？他笑說：「我畀咗個老公佢囉！」家樂又大讚未婚妻孝順和疼錫他。
不過周蕙蕙接受訪問時表情木訥，她透露已邀設計師鄭兆良設計婚紗，亦不忘向記者大讚未婚夫：「佢對我好，對我屋企人都好，我哋一齊好舒服，又鍾意小動物，我哋冇理之前嘅報道係點，大家有信心，所以冇壓力。」周蕙蕙又指父親周亦卿也讚揚吳家樂，但無催促他們生兒育女。
時裝騷結束後，吳家樂與周蕙蕙即偕王賢誌與一女性友人，步行到中環蘭桂坊食飯，其間吳家樂對女友表現體貼，拖實漫步之餘，偶爾亦輕擁其腰肢。
舉杯暢飲走後門
隨後一行四人往花串日本料理進餐，王賢誌坐於靠窗位置，吳家樂和女友則坐於隱蔽座位，現場見侍應曾向吳家樂一枱遞上兩支啤酒，大抵為賀他們大婚將至，互相舉杯慶祝一番。不過，飯後吳家樂和周蕙蕙為避傳媒追訪，故意走後門離場。
採訪：顏英儀
攝影：何國豪、娛樂突發組
