亞視高級副行政總裁兼新聞部老頂關偉最近好氣頂，皆因廣管局就佢哋舊年一宗有關行會討論巴士票價可加可減嘅新聞，引述咗政府消息人士進行審議。廣管局接受觀眾投訴，認為報道有誤導公眾之嫌，皆因當晚政府出咗稿指行會會議保密，電視台報道全屬忖測、沒有根據云云。
八方早前都有寫過呢單嘢，仲話亞記認老作同認錯。關兄就話真係一場誤會，佢哋係有收過廣管局勸喻，但事實證明亞視冇報錯（亞視話行會當日過唔到可加可減建議），因為之後行會拍板，機制出台；仲有，雖然政府稱行會議程保密啫，但係點可以就咁認定亞視唔係從官方聽到消息呢？關兄話：「咁樣小題大做，真係搞笑」。
由此看來，由外行人領導內行人真係好弊。如果政府一出稿就要更正，自打嘴巴話條料係流嘅，個台就可能黐咗線，出得街梗係經過專業判斷啦，唔通真係敢老作咩。呢行最怕食豬紅屙黑屎效應，點會攞自己嘅公信力嚟玩呀？
傳真︰2623-9278
電郵︰[email protected]