今日係財政預算案公布嘅大日子，加稅減稅，大家都已經知道晒答案。我阿利冇乜嘢做，梗係會坐喺梳化睇現場直播。
我以前都講過，財政預算案就係一年一度會計師大紅大紫嘅吉日，響呢日，啲記者必定Call爆全部有名有姓有公職嘅會計師電話。我阿利當然未有呢個級數，有記者追住攞soundbite，不過我都見唔少行家，食食吓飯要覆電話，搞到成日冇乜嘢落肚。
其實呢啲發表意見機會，漸漸都變咗苦差。點解？諗吓有乜新嘢講已經𢱑爆頭。
要主動搵傳媒傾偈
以前就話只有幾間大行有擺心機資源同啲傳媒打交道，所以舊時問來問去都係同一班人。但時移世易，越嚟越多會計師樓識得搵記者編輯傾偈，加上各大會計師公會要鬥擺exposure，搞到過去嗰一個禮拜會計師空群而出。
人多，講嘅嘢自然重複。來來去去唔係稅階擴闊，就係稅率調整一兩個巴仙。呢幾年多咗樣銷售稅講，但睇見政府冇乜聲氣，又慢慢枯死。𠵱家特首要搞連任，呢啲爭議性巨大嘅措施，都唔慌短時間內有機會面世。
所以，各大行家都傷腦筋，一係搵新嘢講，一係鬥快講，就算要講啲三幅被嘢，都唔好被人話執人口水尾。又舊又講過晒，記者睬你都儍。
就係咁，咪以為淨係特首信奉「每日都是競選日」，會計師都係「每日都有財政預算案」，要打醒十二分精神，度啲新angle，搶閘spin啲傳媒朋友。
密搵利
傳真︰2623-9278
電郵︰[email protected]