為提高透明度，個人資料私隱專員吳斌應承每個月都出嚟見吓記者，講吓公署嘅工作，噚日同一班行家見面，除咗講對秘密監察立法嘅意見，仲自爆公署接到嘅一啲有趣個案，好似試過有學生打電話畀佢哋，話老師喺課堂公開點名讚佢成績好，令佢好不滿私隱被侵犯；又試過有老師生日收到校長送生日卡，話個人資料被濫用；仲有破產人士收到破產管理署嘅信，個信封寫住破產管理署個名，佢認為咁樣會俾人知佢破產，於是又向私隱署投訴。
私隱署嘅人員話，佢哋收到呢啲投訴，通常會打電話畀投訴人解釋番法例嘅規定，話畀對方聽投訴個案並唔成立，亦會輔導吓佢哋嘅不滿情緒，通常解釋完一輪，佢哋都會明白。
另外，記者好關心幾時有新嘅副私隱專員上任，吳斌話已經有人選，希望下個月公布。至於被指濫用公費而不獲續約嘅前副專員林永康，吳斌話仲睇緊畀唔畀約滿酬金佢。
傳真︰2623-9278
電郵︰[email protected]