前任政務司司長陳方安生母親方召麐逝世，認識陳太嘅朋友都戥佢難過，事關陳太好孝順，以前做官時工作繁忙，都堅持每星期同媽媽食餐飯聚一聚，因此方老太過身肯定對陳太打擊好大。
不過陳太係做大事嘅人，佢噚日同家人四處奔波辦後事，包括去辦證件同搞喪禮，一切已安排就緒，「我哋屋企人多，所以好辦事，大家分頭做事，搞咗一日，已經差唔多安排好晒。」聽晚會喺香港殯儀館為方老太設靈，後日就出殯。陳太家人喺訃文中形容方老太好安詳咁離開，仲懇請各界友好唔使送花圈喇，將啲錢捐畀公益金或者聯合國兒童基金會香港委員會。
支持陳太嘅人希望佢盡快收拾心情，繼續為香港出力；因為方老太都好鼓勵女兒服務香港，九九年陳太考慮退休，都係方老太叫佢留低，又勸陳太面對批評時，應該以有容乃大心態面對。
特首遲來的惋惜
方家家世顯赫，唔少人係社會各界獨當一面嘅人物，社聯行政總裁方敏生噚日同八方講，姑媽走得好突然，唔少親人前日知道消息後都感到有啲愕然同唔舒服，皆因今年農曆年時佢都有同姑媽拜年，當時姑媽健康情況尚可。方敏生又話，一眾親人知道噩耗後，即時趕去醫院希望送佢最後一程，姑媽遺體送去殯儀館時，親友都在場向載住姑媽嘅靈車道別。
方老太○三年獲特區政府頒銅紫荊星章，肯定佢喺中國水墨畫同書法藝術上嘅成就，不過特首曾蔭權反應就慢一拍；特首辦答記者話，煲呔噚日已經打過電話畀陳太慰問，對於方老太去世，特首感到惋惜。陳太話，煲呔噚朝有親自打電話問候。咁都算佢有啲人情味啦。
而陳太好友李麗娟噚朝亦有同陳太通電話，仲話如果要幫手，記得通知一聲。陳太喺官場縱橫多年，朋友眾多，所以佢噚日收慰問電話都收不停。
紀念展暫難成事
煲呔反應慢，康樂及文化事務署轉數就快啲，佢哋噚日內部已經傾過為方老太搞個紀念展。康文署轄下藝術館同博物館原來一共收藏咗十三幅方老太作品，不過，由於數量唔多，專家認為藏品唔足夠涵蓋方老太創作生涯代表作，所以要向方家或其他收藏家借畫先至夠。咁籌備都要時間，故此短期內唔會開得成。
康文署二○○一年曾為方老太喺中央圖書館搞展覽，當時大部份展品都係方老太借出，近年方老太多數將作品慈善拍賣，有藝術界人士話香港有系統、大規模收藏方老太作品嘅收藏家唔多，所以要公開欣賞佢嘅作品，機會都唔多喇。
傳真︰2623-9278
電郵︰[email protected]