大嶼山愉景灣發展商香港興業昨午舉行春茗，老闆查懋成率領手下猛將如何栢貞、鄧滿華、陳子明、梁綺蓮等，喺滿福樓同一眾記者談天說地。查老闆講得最多係仿製鄭和下西洋嗰隻木船嘅計劃，佢話隻船會喺福建造，長逾六十米，但未知價錢。蘭西好肯定，如果講古木船，冇邊個地產商熟過佢。
兩位董事何栢貞同鄧滿華就講咗好多地產嘅趣聞，原來第一個建示範單位賣樓嘅人就係何栢貞。當時係七十年代中，佢喺置地，賣薄扶林置富花園，喺雪廠街九號搭兩個示範單位，開創先河。
咁香港興業本身亦有個香港第一。鄧滿華問大家記唔記得全香港第一個有住客會所嘅項目係邊個？蘭西都唔記得，只知大如太古城都冇會所。答案係愉景灣。八○年賣樓，用消閒度假概念包裝，估唔到，二十年後，乜嘢屋苑都有會所。
鄧滿華又講咗個買樓趣事，佢話香港人買樓好閒事，試過有位太太，經過愉景灣售樓處入去睇睇，咁就買咗兩個單位。點知返到屋企俾老公鬧鬼，於是硬住頭皮折返要求退貨，而興業又肯畀佢退，結果佢揸一個退一個。𠵱家計落就賺少咗好多呢。
電郵地址：[email protected]