噚日恒隆系公布中期業績，罕有咁喺中午1點食晏時間舉行記者會，原來並唔係主席陳啟宗想請各位記者食午飯，只係亞洲協會今年踏入50周年，所以有關方面隆而重之，星期四喺美國紐約搞咗個盛大慶祝會，作為香港分會主席嘅陳啟宗，點可以缺席。所以噚日即使係自己集團公布業績開記者會，佢都只係蒲一蒲頭，坐唔夠半粒鐘，就趕去機場。
陳啟宗重話，已經獲得特首曾蔭權答應，喺香港時間星期五早上，透過電視向亞洲協會成員講話。
陳啟宗唔理自己集團業績記者會，曾特首又肯百忙中抽時間，亞洲協會有幾巴閉呢？據網上資料顯示，亞洲協會總會由美國富商洛克菲勒家族喺1956年創立，總部設喺紐約，係一個非牟利、無黨派嘅教育機構，透過論壇增加美國人對亞太地區三十幾個國家嘅認識。促進美、亞聯繫，又真係幾任重道遠。