如有雷同，實屬巧合！這個坑渠蓋與早前坑渠蓋盜竊事件絕無關係，實情它是用來盛着番梘的器皿，造型似層層幾可亂真，就連拍攝時記者身後的路人甲都爆了一句：「無嘢好玩呀，玩坑渠蓋？」其實，設計師有此一着，無非都是為家居增添一兩件趣致擺設，打破平凡悶局。難得是攝影師肯同記者癲埋一份，他伏在銅鑼灣繁忙的行人路上拍攝，臨尾亦爆了一句：「呢件嘢又的確幾爆！」
記者：招佩珊
攝影：陳陶鈞
坑渠蓋番梘碟$195（a）
以不脫色合金鑄造的番梘碟相當重秤，重量拍得住嚿磚，令銀面Coating防水唔怕生銹。
點只番梘碟咁簡單
本應番梘才是主角，然而，用來擺放它的器皿，不再是一隻碟那麼平凡，最新搞鬼之作是外形似足坑渠蓋；大抵你未必會用番梘，或者可以用來放散銀或鎖匙等小物件，甚或當作裝飾擺設，夠過癮；其他款式亦有其獨特造型，視乎你着重實用性定講求賣相。
簡約竹碟$45（a）
古老當時興，阿婆年代用的竹架再度回歸，積水由竹枝間流走，用料同設計一切從簡，最重要是經濟實惠。
似蒸籠$140（a）
圍住底部的金屬片似點心蒸籠，碟面的圓形架像蒸籠墊底的金屬片，可隔積水。
儲物瓷盒$75（a）
啞黑色的陶瓷長方盒設計，下層可盛起積水，唔擺番梘用來儲放棉花棒亦得。
套裝用具
真金白銀最搶眼
講到浴室用具，漱口杯、梘液樽及牙刷座始終較大路，只要行一轉百貨公司的浴室用品部，玻璃、瓷器、厚膠、大花圖案、鑲貝殼……花款百出，放置一套於浴室，既可增添生活品味，亦不失為一個裝飾浴室的好方法。在今回介紹的款式中，論最養眼必屬綴以金、銀箔，又金又銀，出奇地又唔覺俗氣，少少哋點綴一下確實唔算誇，襯啱浴室的色調可以凸顯品味。
富貴金箔
厚厚的阿加力膠包有金箔，認真貴氣，拍攝當日剛剛有個講國語男子連埋托盤買齊全套，唔好話無人Buy金！
（allb）
銀箔夠閃
與金箔款式屬同一系列，意大利入口，換上銀箔更能折射燈光，睇落更閃更養眼。
（allb）
貼近海洋
貝殼被阿加力膠包圍住，勁有海洋Feel，這套用具可當作裝飾品。
（allb）
齊全方盒
藍色半透明膠製系列，有梘液樽、番梘碟、棉花球盒、紙巾盒及漱口杯，一應俱備。
$69.9/套（d）
全通透
LIMMAREN淺綠色玻璃用具有齊杯、番梘碟及梘液樽，另多一個樽可放潤膚露或香薰油。
$89.9/套（d）
皮繩民族Feel
磨砂膠杯、膠樽、膠碟先圍上一層啡色膠料，再加上麻繩及皮繩點綴，富有民族色彩。
（alle）
營造Spa氣氛
ZenSpa系列用上火山石作物料及人手製造，正好為浴室添上Spa的感覺。
（alla）
黑白繪畫
白色的瓷器印上如素描畫的城市掠影，如將一幅藝術畫搬上去。
（alle）
搶眼大膠花
春天少不了的花卉圖案，同款膠製用具另有紅、藍及綠色。
（allc）
杯架連體
方形紅色膠架上有放牙刷及牙膏的間隔，2隻漱口杯可以套入架內合二為一，成Set放在一起夠整齊。
$198/套（e）
幸運條子
這套美國浴室用具品牌Creative的出品，名叫「LuckyStrip」，用它是否會真的更幸運？
（alle）
售賣點
（a）GOD
（28905555）
銅鑼灣禮頓中心2樓（霎東街入口）
（b）AvantGarde
（25260104）
金鐘太古廣場第2期133號舖
（c）city'super
（25062888）
銅鑼灣時代廣場地庫B1
（d）IKEA
（31250888）
九龍灣德福廣場第2期3樓
（e）崇光百貨－銅鑼灣店
（28338338）
銅鑼灣軒尼詩道555號