到酒店參加宴會,碰到醫管局人員阿P,互道恭喜發財,講完先至記得公職人員唔可以隨便發財,只可靠份人工。炒吓股票,賭吓馬,賭吓波都得嘅,不過喺股馬波三方面發財,你估話咁容易咩,隨時輸凸。有時我哋對公職人員之嚴守規矩,直情好佩服,譬如署理廣播處長吳錫輝參加傳媒春茗「馨香宴」,一簽完名,接待人員送上名牌,以便放在抽獎箱作抽獎之用,吳錫輝立即將名牌放入自己嘅西裝袋,行開咗,於是抽獎箱內冇佢嘅名牌,佢一定唔會中獎。新入行嘅新聞統籌員何安達係公僕新仔,唔識呢招,哈,後來抽獎竟然抽中,Andy立即醒水,唔肯要。Andy一入侯門,月薪不過十四萬幾,自動放棄好多財路,朝朝五點九起身返工,可以講得係,搵錢比以前少好多,工作時間比以前長好多,自由度更大大壓縮,為乜呀?只為試吓親身落場踢波嘅滋味,旁人就戥佢唔抵。
醫管局來了一位澳洲人做總裁,左丁山問阿P:「新總裁嘅中文名叫做蘇利民,好似與渣打銀行香港區總管同名喎?點解蘇利民都要鬧雙胞?」阿P話:「我哋嗰位叫Soloman,一般譯做蘇利民,蘇樂民,所羅門,渣打嗰位Sullivan一般譯作蘇利雲,蘇利民,結果大家都鍾意蘇利民,可謂如有雷同,乃屬巧合。」
名字雖同,待遇差天共地。渣打蘇利民住在南區香島道獨立屋,據賓架界講,淨係租金都三十六萬銀一個月,計埋薪水花紅,一年待遇相信有八位數字。醫管局一年預算二百七十億元,蘇利民總裁有幾多薪水呢?阿P話,所有一切計埋,約莫「硬掘」三十六萬銀一個月,唔夠渣打蘇利民交租及交水電煤氣費。呢位醫管局蘇利民在澳洲擁有農場二十畝,來港住在半山區所謂二千呎豪宅,月租十萬(自月薪扣除),唔知佢會唔會覺得好侷促,全無活動空間呢?