無錯，法國菜一向予人貴夾唔飽的感覺，不過，想試一頓正宗法國菜，唔一定要走入大酒店或者餐廳，西貢白沙灣就有一家價錢合理的法國私房菜，老闆Bonnie留法學藝3年有成，當中一道傳統法國豬大腸奇臭無比，不過法英混血模特兒Makayla卻食到豎起手指公，原來法國都有菜式與中式臭豆腐一樣，愈臭愈好味。
記者：羅灝汶
攝影：林栢鈞
模特兒：Makayla（StarzPeople）
裝修簡約Homefeeling
步入「ChezlesCopains」，不其然有種優閑的感覺，牆上釘滿客人「吃得開心」的證據，一幅一幅的合照不乏名人明星，附近居住的鄭伊健、梁詠琪、名媛陳細潔等都曾經捧過場，老闆兼大廚Bonnie話：「白沙灣環境清新，呢度屬於原居民蘇氏宗親所有，行唔使3分鐘就可去到碼頭，間餐廳都係我祖屋嚟㗎。」餐廳沒特定菜譜，原因她堅持煮最新鮮的食材：「9成食材都由法國空運到港，入唔到靚貨我寧願唔整。」她曾居住法國，花3年時間於法國藍帶廚藝學校主修法國菜，這間學校的畢業生不乏香港人，如為人熟識主修製餅的李曾超群等，所以出品絕對唔會揸流灘，難怪連英法模特兒Makayla都讚夠正宗：「連傳統法國豬大腸都有得食，不過好臭呀。」
餐前小食
凍小豬手
隨餐奉送，新鮮小豬手由法國空運到港，味道甘香看似一片豬肉腸，入口啖啖肉，法國人愛以之配餐酒食用，屬開胃小食。
頭盤
鵝肝醬黑菌配紅莓啫喱$150
自製鵝肝醬花2日工序，因為焗好的新鮮鵝肝醬會變得鬆軟，所以要用重物壓實，之後放入雪櫃雪一日。這是Bonnie的招牌菜，經常有客人特別向Bonnie訂鵝肝醬，重話好食過不少大酒店。
千層吞拿魚番茄沙律$130
微溫沙律口感好特別，吞拿魚中有一陣鮮香味，蔬菜保證絕對新鮮，非常有田園Feel的一道菜，賣相靚到有啲唔捨得食。
主菜
法國傳統豬大腸$220
知悉有模特兒試菜，Bonnie特別煮這道傳統法國菜：「我用喺法國評為5星級嘅豬大腸，腸中又有腸，大腸釀入豬小腸，豬小腸又入其他肉類，名副其實腸中腸。」Makayla試味：「法國豬大腸又叫臭腸，味道好臭吓，唔係人人接受到到。」攝影哥哥貪口爽一試大讚：「好味，啖啖肉，正。」我就真係頂唔順喇。
法國黑豬肉$220
法國空運到港的黑豬肉脂肪比例相當高，甚至比本地五花腩更厲害，不過經烹調後脂肪層神奇地減少，入口彈牙，口感似平常吃開的燒肉，好過癮。
餐湯
開心果忌廉湯$80
Bonnie自創，用攪碎的開心果煮忌廉湯，味道非常濃郁，客人可要求把果仁碎隔走，所以有2種不同口感，一個香滑，另一個有啖啖果仁碎，好味有咬口。
甜品
杏仁薄脆焦糖吉士配士多啤梨$80
好考手藝，焗好的杏仁薄脆外形似曲奇餅，要趁熱食否則好快變腍，士多啤梨汁的酸甜與焦糖出奇地配合，無話甜到漏，好啱女仔食。
自製朱古力盒
隨餐奉送，控制火候要得宜，把Homemade朱古力倒模成心形，配法國人最愛的朱古力橙皮，一啖朱古力一啖橙香，真係好正。朱古力盒可以打開再放入其他朱古力，相當精緻。
食客有Say
Natile：「我自己都有學烹飪，Bonnie整嘅法國菜的確好正宗，所以我都會經常幫襯同偷師。」
ChezLesCopains（22431918）
地址：西貢白沙灣117號地下
營業時間︰6:30pm-12:00mn，逢星期二休息
座位：40個
