Joyce、Esprit等大牌子，逐一喺中環皇后大道中落點，帶旺附近租務，最新消息話，運動鞋Nike都準備搬埋過去，喺Joyce同Esprit之間嘅萬年大廈開舖，聽講月租過百萬。
Nike睇中萬年兩個孖舖，LeSaunda同Joy&Peace鞋店租緊，每個千五呎，兩年幾前租落，每個現租四十萬，幾個月後約滿，業主新世界早排向代理放盤，月租每個加到六十幾萬，加幅逾半，LeSaunda同Joy&Peace都話頂唔順。
Nike租舖，一向精打細算，𠵱家租緊德己立街世紀廣場一樓千八呎舖，呎租二百，月租三十六萬，平萬年孖舖一半有多。之不過，萬年始終係大道中地舖，具廣告效益同戰略性，所以畀貴啲、租萬年，都可以理解。
Esprit頂咗花旗銀行個舖，已經裝修緊，相信好快有番新景象。