中環服務式住宅四季滙，兩個頂層連天台單位，之前以呎租一百一十五、貴過頂級商廈租出，其中一伙約滿，再度招租，有六個客接洽。
租金係咪可以再創新高，四季滙租務總監官曉霓話不便透露。
呢個三千五百六十呎單位，有六個準租客，嚟自金融、銀行及地產等行業，租期六至十二個月。佢哋睇過單位一兩次。
四季滙共五百一十九伙，逾九成租出，租期六至十二個月，呎租六十。唔計頂層兩伙，舊年租金收三億，估計今年增加一成半至兩成。官曉霓話，𠵱家有四家金融機構，合共洽租一百伙，租期兩至六個月。
收得咁貴租，服務要有番咁上下，官曉霓話，公司定期做調查，收集住宅意見。新春期間，請咗師傅寫揮春，及介紹中國人過年用嘅攢盒，有個外籍客話好想買個攞喺屋企，佢哋一於代辦。