雖然近排多次出現股仔暴跌事件，但無損散戶追炒其他股仔的興致。中國金展（162）公布收購新疆百貨業務後復牌，開市冇耐即急升上0.68元，但升得快時回得更快，一度要倒跌，雖然埋單仍升5.77％，收0.55元。但晨早聽消息在高位追入的炒友，全部都要中伏損手。
雖然金展走勢頗肉酸，但經紀陳話覺得隻股未炒完，只係人哋炒得高明，唔會亂嘥子彈。隻股冇消息多年，剛剛先至擺檔生意落去，斷估冇咁快收工。
若然唔鍾意細size股票，經紀黃話可以考慮華鼎（3398）。佢話華鼎唔係一般製衣股，佢有自己品牌，兼且有零售店舖。保母在上市時推介，已講明唔能夠以純粹製衣股嚟睇，應該以半隻零售股視之。
華鼎去年12月上市，招股價2.025元，曾經破底至1.80元，最高見過2.775元。昨日升3.88％，收2.675元。
有證券行幫華鼎計過數，06年的預測PE10多倍，以工業股計唔算平，但若以近排升唔停的大陸零售股嚟睇，又似乎好抵玩。
慕容小初