香港報業評議會噚日喺跑馬地馬會會所舉行午宴，慶祝成立五周年，連任做主席嘅陳坤耀校長好有面，請到人氣高企嘅律政司司長黃仁龍做嘉賓，陳校長仲喺台上自爆，同司長都係皇仁出品，當然佢係大大師兄。
咁皇仁又真係人多勢眾，加埋湯家驊，噚日共有三個皇仁仔聚首一堂，個個都有江湖地位。湯大狀話，皇仁校友前幾日先搞咗個聚會，都好多人出席，獨不見肥龍。佢仲講笑話自己同陳校長輩份差唔多，但係龍仔就真係好細喇，佢口中嘅「龍仔」正係黃仁龍司長。
黃司長比梁愛詩低調，所以一出現就俾記者圍住，問長問短，睇吓佢適唔適應新工。司長話太太真係有啲抱怨，話少咗時間畀屋企。梗係啦，司長以前做大狀，接案打，一單還一單，𠵱家就面對成個部門咁多嘢，肯定忙好多。有行家問佢係咪有機會將來做特首，一聽到呢條問題，司長就笑笑口掉頭走。
傳真︰2623-9278
電郵︰[email protected]