趙飛雲去年炒過恒地（012）幾次，但始終都升唔破40元關。昨日港府宣布推倒原先的西九計劃，重新洗牌打過，恒地即刻升破40元大關，以接近全日高位收市，報40.60元，升2.27%。
其實恒地為取得西九發展權做咗唔少工夫及使唔少錢，趙飛雲睇過佢哋嘅模型展覽，即場附送精美介紹冊及光碟，如今政府推倒西九計劃，恒地股價反而彈升，相信係因為四叔曾講過為咗搞好西九計劃，可以賺少啲甚至唔賺錢。言者無心，聽者有意，可能因此嚇親唔少投資者，對恒地存有戒心，如今西九發展計劃重新搞過，投資者亦放心重投恒地懷抱。
守40元可買入
恒地走勢出現技術突破，下一站上試去年8月高位41.15元，若以升破複式頭肩底量度升幅計，可見46元，若見後抽守穩頸線40元水平，可以跟入。
港股前日偷步在先，昨日欲跌還升，反映市底的確夠硬。趙飛雲午市見滙控（005）扭跌為升，在0.29元買入40萬份滙控C輪9535。滙控最後升0.20元，收129.60元，但不少C輪卻收縮溢價，倒跌收場，9535收0.29元，跌0.01元或3.3%。
買9535純作短炒，博滙控3月初升上132元水平，在0.40元水平食糊，以0.22元作止蝕位。
新世界（017）昨日高見12.25元，收12.05元，仍升1.7%。新世界走勢初現突破，今日若見守穩12元，可加1注，短炒首目標13.20元。
遠展（035）前日未有在3.175元補回5萬股，昨升上3.275元收市，錯失低吸機會，今日若升破3.30元，將上試3.375元，但短期在3.175-3.40元上落的機會較大。
趙飛雲