住宅樓市高位回落後，摸貨成交銳減，有都係蝕居多，睇怕炒家重要等多一輪，至有機會獲利。不過，工廈市場完全唔同，摸貨活躍，大部份有得賺。觀塘、荃灣及葵涌係熱炒地區。
葵涌美聯工業大廈，中層C、D室，共逾七千九呎，炒家舊年十二月用二百八十二萬購入，低市價三巴仙，兼攞到四個月成交期，揸咗兩個月就成功摸出畀用家，作價三百二十八萬，執一成六，即四十六萬，好過存錢銀行多多聲。
荃灣及葵涌有唔少炒家，佔整體放盤一成半，連約單位，成交期可以有三至五個月，假如摸唔出，班炒家就索性上會，裝修單位後放租，做高個回報，再放盤就可以賣到好價嘞。
利嘉閣朱亮恒話，美聯工廈試過有投資者用呎價三百五十買入單位，裝修完竟然可以賣到四百五十蚊一呎，新回報重有九厘。另外，有炒家舊年十一月買入葵涌豪華工業大廈三千呎單位，成交期長到今年五月，原因係業主有租收緊，唔介意一早鎖定利潤。
朱亮恒話，噚日有投資者買入三個工廈單位，即刻加價一成半至兩成放盤，可見呢區工廈炒風幾咁熾熱。
月初至今，荃灣及葵涌工廈成交比上月同期增加一成半，造價升半成。